Poesie còrse tratte dal sito www.radiche.eu

pè Ghjennaghju 2008 A CANNA E 'A QUERCIA - LE ROSEAU ET LE CHÊNE 'A Canna troppu astuta disse un ghiornu a la Quercia: «Eo ún m'imbroncu. Mi piegu, ma ún mi troncu! » Ma vense u Pasturellu, e a la manuta, pîgata ch'ella fu, nant'a u dinocchiu la truncò dinù per fanne, appena appena, un fischiulellu. Da tandu fischia ad ogni ventulellu. (Anton Francescu Filippini)

pè Marzu 2008

MAMMA LEVRA MAMAN LIÈVRE A sente 'a Levra vantassi di figlià leprotti ogni mese, u Cuccu disse: «Ogni paese ha qualchi scemu pè i so' spassi! Duve i 'ntani tutti, ó mischina, s'elli sò anch'elli cum'e te, quandu u Filanciu, ch'é lu re di sti lochi, intondu rapina? Più figlioli faci, e piú quellu da l'altu vi justra e v'insidia! E menu male poi chi ellu di li famiglioni unn ha invidia! S'ellu si truvasse un Filanciu per ogni Levra, dí puru ch'ellu sarebbe mal sicuru ancu l'Omu, l'altru piglianciu». A chi ghiova di cresce in banda s'ell'é per ticchià chi cumanda? (Anton Francescu Filippini)

Mamma Lepre A sentire la Lepre vantarsi di figliare leprotti ogni mese il Cuculo disse: «Ogni paese ha qualche scemo per spassarsela! Dove li rintani tutti, o meschina, se sono anche loro come te, quando il Nibbio, che è il re di questi luoghi, in tondo rapina? Più figlioli fai, e più quello dall'alto vi giostra [gioca] e v'insidia! E meno male poi che delle famiglione non ha invidia! Se si trovasse un Nibbio per ogni Lepre, di' pure che sarebbe mal sicuro anche l'Uomo, l'altro ladrone ». A che serve crescere in gruppo se è per ingozzare chi comanda? (libera traduzione - F.D.)

pè Maghju 2008 'A SETE DI U SCEMU - LA SOIF DU FOU Un andaccianu tontu, e forse pazzu, aragnatu di sete pè 'a sulana, passò caschicinendu u fiume a guazzu cun l'idea di truvà qualchi funtana. A un certu tale ch'era a l'altra sponda cherse, escendu da l'onda: «Ó quell'Omu, mi dite, per piacè, s'ella c'é da ste bande una surgente?» L'altru disse: «Un ci n'é; ma inquantu a me beiu, chí bona ié, st'acqua currente. Chí ún la feste ancu voi, se v'avete cum'ellu c'é da crede tanta sete?» Ellu, tandu: «Ohimè, l'agghiu capita! Sò natu disgraziatu, unn é quistione, chí pè stacci ancu tutta la miò vita, e s'avessì per corpu ancu un stagnone, st'acqua, ëo, ún la possu beie tutta!» E u scemu si ne stéte a gola asciutta. Eccu cum'elli vanu tanti lòmbati in giru pè stu mondu: certi d'ún pudè fà le cose a fondu, ún ci mettenu mancu 'a prima manu. (Anton Francescu Filippini)

pè Uttobre 2008 U CANE E U CASTAGNU - LE CHIEN ET LE CHÂTAIGNER - Perchí t'affliggi, ó Cane? - 'A sai be' quant'e me, ó Castagnu carissimu, é perchè ogni essere piú ingratu é dettu Cane. - Ùn t'affligge piú, Cane. Dà retta puru a me: canacciu piú che te ghié l'omu chi mi sbremba sera e mane. Ó Cane, ó Cane, fràialu l'ingratu chi t'arrubò lu nome e l'ha imbruttatu. (Anton Francescu Filippini)

pè Uttobre 2009 U TOPU E U GATTU LA SOURIS ET LE CHAT «Anch'eo, disse lu Gattu, sò figliolu di Dio. Lasciatemi, ó Cristiani, ciò ch'é meo.» U 'ntese un tuparellu scunciafattu chi subitu, in falzettu, disse: «Ed eo?» (Anton Francescu Filippini)

pè Marzu 2010 'A VACCA ASCIUTTA LA VACHE TARIE Un tale, cun passione, architittava un gran festinu pè 'a famiglia intera. Or avendu una vacca, chi li dava una secchia di latte mane e sera, per copre tutte inseme le so' spese, pensò d'ún múnghie 'a vacca per un mese. Ma in fin di mese u lòmbatu ebbe asgiu a múnghiela cun forza a tira tira. Latte ún ne vense mancu per un casgiu. Ogghie s'ellu ci pensa ne suspira; tandu, in zerga, l'astutu di la sacca cu 'a povera innucente 'a si pigliò e, per falla finita, 'a macellò. Unn ebbe piú, cusí, latte nè vacca. O astuti chi circate alti guadagni, mai cuntenti di 'a liccia d'ogni jornu, ún scundisate 'a via di u ritornu, o seranu per voi spasimi e lagni. (Anton Francescu Filippini)

pè Sittembre 2010 FIGLIOLU TONTU FILS STUPIDE Cusí sentenzia la Sacra Scrittura: strazia tu, vecchiu, ch'âi la pelle dura! «Dumane, disse u Babbu a u so' figliolu, alzati prestu per andà in Bastía. Preparati stasera u tuvagliolu e 'a zucca, ch'é una bella cumpagnía». A l'alba, senza piú tottu nè mottu, u 'ntese ch' partía. S'alzò di colpu, lu sonnu interrottu, gridendu: «Duve vai?» E l'altru, imbasgialitu: «Or bella, via: ún m'hai dettu tu d'andà in citai?» E u Babbu allora: «Cum'e fera tonta dunque tu parti, e ún dumandi perchè! Ci ne saranu albasgi cum'e te? Si qualchidumi la m'avesse conta, ún so s'eo mi serebbi cumandatu. Entri in casa; richînati ó scimò. Fa cum'e se tu fusse riturnatu!» E u Babbu, a dilla corta, s'avviò. Corciu lu vecchiu male affigliulatu! (Anton Francescu Filippini)